Ötən gün “Borussiya”nın (Dortmund) Çempionlar Liqasında PSJ-ni mübarizədən uzaqlaşdırıb finala vəsiqə qazanması sürpriz oldu. Çünki futbol azarkeşlərinin böyük əksəriyyəti Fransa təmsilçisinin finala adlamasını gözləyirdi. Real yanaşsaq, görərik ki, PSJ-nin qələbəsinə inanmaq üçün yetərli səbəblər var idi. 

Baş məşqçiləri Luis Enrike olandan sonra baxımlı futbol oynayan parislilər Avropada büdcəsi ən yaxşı olan klublardan biridir. Bununla yanaşı, PSJ-nin güclü heyəti onun turnirin əsas favoritlərindən biri olması üçün yetərli səbəbdir. 

Hətta “Real” “Mançester Siti”ni (4:3) udduqdan sonra PSJ-nin ÇL qalibi olacağı ilə bağlı iddialar və düşüncələr güclənmişdi.

Bütün bunlara baxmayaraq, indi dünya idman mediası xəbər başlıqlarını PSJ-nin növbəti mərhələ üçün qarşılaşacağı rəqibindən yox, sadəcə “Borussiya” və ona qələbə qazandıran çalışdırıcısı Edin Terziçdən yazır. 

Klublar qələbə qazananda da, məğlub olanda da bütün nəticələrin memarı kimi baş məşqçiləri göstərirlər. Bəs, dünyanın danışdığı “arılar”ın baş məşqçisi Edin Terziç kimdir? 

“gecemiz.az” xəbər verir ki, Almaniyada doğulan əslən xorvat Edin Terziç futbolçu olsa da, heç vaxt yüksək liqalarda çıxış etməyib. Daha çox həvəskar çempionatlarda oynayıb. Onun karyerasına nəzər salsaq, fantastik bir şey görə bilmərik. Bundan sonra isə azarkeşə çevrilib. O, 2013-ci ildə keçirilən və “Bavariya”ya qarşı oynanılan Çempionlar Liqası finalını izləyib. “Borussiya”nı stadiondan dəstəkləyən sıradan azarkeşlərdən biri kimi... 

Daha sonra isə məşqçi olmaq qərarına gəlir. Aşağı yaş qruplarında çalışmağa başlayır. 2013-2015-ci illərdə “Beşiktaş”ın çalışdırıcısı Slaven Biliçin köməkçisi vəzifəsində fəaliyyət göstərir. 2018-ci ildən isə köməkçi məşqçi kimi, 2022-ci ildən bu günə qədər isə “Borussiya”nın baş məşqçi postundadır. 

Bəs, necə oldu ki, o, azarkeş kimi dəstəklədiyi komandanı 11 il sonra baş məşqçi olaraq Çempionlar Liqasının finalına çıxardı? 

Mütəxəssis ötən mövsümün son turunda Bundesliqa çempionluğunu qaçıranda azarkeşlər ona dəstək olmuşdu. Rəhbərlik də Terziçə güvənərək vəzifəsində saxlamışdı. O isə bir neçə transfer edib komandasını gücləndirdi. Bunlardan yalnız Marsel Sabitzeri əsas oyunçu saymaq olar.  

Mövsümün startından E.Terziçin klubunu nəinki ÇL-də finala daşıması, hətta özünün vəzifəsində qalıb-qalmayacağı belə bəlli deyildi. Hətta Terziçin uğursuzluqlarını sələfi Yurgen Kloppun kölgəsində qalmaqla da əlaqələndirirdilər. Dortmund cameəsi bütün uğurları, qələbəni sadəcə Kloppun qazana bildiyini düşünərək ona bağlayırdılar. Terziç isə bu mövsüm liqada yaxşı çıxış edə bilmədiyi üçün də tənqidlərə məruz qalmışdı.

Amma o, Avropa meydanlarında “at oynada” bildi. Liqadakı uğursuzluğu nəhəng klubların mübarizə apardığı turnirdə sürpriz ardınca sürpriz edərək sığortaladı. 

İstefası gözlənilən baş məşqçinin PSJ üzərindəki bu qələbəsi ən azından müqaviləsi bitənədək klubda qalmasına kifayət edəcək. Çünki 41 yaşlı mütəxəssisin çalışdırıcı kimi “arılar”la qazandığı yeganə titulu məhz ölkə kubokudur. Əgər qitənin əsas turnirində qalib ola bilsələr, bu fantastik nəticə tarixə yazılacaq və Yurgen Kloppun 2013-cü il finalı unudulacaq. 

Əslində, Parisdə qələbə qolunu vuran futbolçu da dortmundlular üçün sıradan biri deyil. Onun kim olduğunu anlamaq üçün 11 il öncəyə səyahət etmək olar. “Arılar”ın əfsanələrindən biri... 

Belə ki, klub 2013-cü ildə qitənin ən nüfuzlu turnirinin finalına adlayarkən Mats Hammels heyətdə yer alırdı. Almanlar üçün həmin tarixi oyundan keçən 11 ildə mübarizə aparan Hammels bu dəfə Parisdə finala gedən qolun müəllifi oldu. 

Həmin final “Borussiya”da Yurgen Kloopun vəzifədə olduğu dönəmə təsadüf edir. Karyerasının böyük hissəsini Dortmund təmsilçisinə həsr edən M.Hammelslə bir yerdə komandada qalan digər oyunçu isə Marko Roysdur.

Adıçəkilən futbolçular, dortmundluların sevimliləri elə dünən PSJ ilə baş tutan oyundakı heyətdə də var idilər. 

Məlumat üçün onu da qeyd edək ki, klubun keçmiş əsas oyunçularından olan Kevin Qrosskroytsun PSJ ilə keçirilən ilk oyunu tribunadan izləməsi də diqqətçəkən məqamlardandır. Belə ki, 2013-cü ildə Terziçin stadiondan izlədiyi oyunun heyətində Kevin Qrosskroyts da olub. 11 il keçib, ancaq tək dəyişən Terziçlə Kevinin yeridir. İndi “Signal İduna Park”ın meydanında Terziç, tribunasında isə Kevin Qrosskroyts var...

Fidan Etibar