 |
 |
Gecemiz.az |  |
 |
Bəhram bəy Axundov (1861, Şuşa – 1932, Bakı) — Fransanın Lill Akademiyasının məzunu, ADR-in Milli məclisinin üzvü, həkim.
| Bəhram bəy Axundov | |
|---|---|
 | |
| Şəxsi məlumatlar | |
| Doğum tarixi | 1861 |
| Doğum yeri | |
| Vəfat tarixi | 1932 |
| Vəfat yeri | |
| Təhsili | |
| Fəaliyyəti | həkim |
Bəhram bəy Mirzə Cəfər bəy oğlu Axundov 1861-ci ildə Şuşa şəhərində anadan olmuşdur. O, 15 iyun 1892-ci il tarixində Şuşa Real məktəbində imtahanları müvəffəqiyyətlə başa vuraraq müvafiq şəhadətnamə almışdır. Əldə edilmiş təhsil göstəriciləri və maraqları onu ali təhsil almaq məqsədilə Avropaya yönləndirmişdir.[1]
Bəhram bəy Axundov 1893-cü ildən etibarən Fransada təhsil almış, əvvəlcə Parisdəki Sorbon Universitetində kurs keçmiş və 31 iyul 1894-cü ildə bu tədris mərhələsini təsdiqləyən şəhadətnamə almışdır. Ardınca Fransanın Lill Universitetinin Təbiyyat (təbiət elmləri) fakültəsində təhsil almış, burada mühazirələr dinləmiş, imtahanlardan müvəffəqiyyətlə keçərək 13 noyabr 1896-cı ildə təbiyyat elmləri üzrə rəsmi şəhadətnamə ilə təltif olunmuşdur.[1]
O, təhsilini Lill Universitetinin tibb fakültəsində davam etdirmiş, bu sahədə də kursu müvəffəqiyyətlə başa vuraraq 2 oktyabr 1901-ci il tarixində tibb doktoru diplomu almışdır. Fransada təhsilini başa vurduqdan sonra 1902–1903-cü illərdə Təbrizdə Qacar sarayının həkimi kimi fəaliyyət göstərmişdir (26 iyul 1903-cü il tarixli fərman əsasında).[2]
Azərbaycana qayıtdıqdan sonra, 1904-cü ildə Xarkov Universiteti nəzdindəki Tibbi İmtahan Komissiyasının imtahanlarını müvəffəqiyyətlə verərək 22 iyun 1904-cü ildə imperiya çərçivəsində tanınan “lekar” (həkim) diplomunu almışdır.[1]
Sonrakı illərdə Bakı şəhərində yerləşən “Bakı ikinci kişi gimnaziyası”nda məktəb həkimi kimi çalışmışdır. 8 iyul 1913-cü ildə isə “Bakı üçüncü qadın gimnaziyası”nın Pedaqoji Şurasının sədrinə məktub ünvanlayaraq, həmin təhsil müəssisəsində də həkim vəzifəsinə qəbul olunmaq istədiyini bildirmişdir. Bu məktubda o, ixtisas sahələri olaraq daxili, uşaq və əsəb xəstəliklərini göstərmiş və müxtəlif şəxs və qurumların onun haqqında rəy verə biləcəyini əlavə etmişdir.[2][3]
XX əsrin 20–30-cu illərində də səhiyyə sahəsində fəaliyyətini davam etdirən Bəhram bəy Axundov, 1920–1925-ci illərdə Dövlət Sığorta İdarəsində (Qosstrax) çalışmış, Xalq Komissarları Şurasının tərkibində səhiyyə üzrə mütəxəssis kimi fəaliyyət göstərmişdir.
Bəhram bəy Axundov 20-ci əsrin əvvəllərində Bakı ictimai həyatında da fəal iştirak etmişdir. O, "Nicat" və "Səfa" xeyriyyə cəmiyyətlərinin üzvü olmuşdur. Azərbaycan Xalq Cümhuriyyəti dövründə Parlamentə seçilmiş və bitərəflər fraksiyasının tərkibində təmsil olunmuşdur.[4]
1919-cu ildə AXP hökumətinin qərarı ilə Bəhram bəyə xaricdə təhsil alacaq tələbələrin sağlamlıq durumuna nəzarət etmək vəzifəsi tapşırılmışdır. Bu vəzifə çərçivəsində tələbələrin sağlamlıq baxımından seçimində iştirak etmiş və onların xaricə göndərilməsi prosesində fəaliyyət göstərmişdir.
Bəhram bəy Axundov Mariya Selestina Emilyevna ilə ailə həyatı qurmuşdur. Bu nikahdan iki övladı dünyaya gəlmişdir: Əli bəy Axundov (12 oktyabr 1908) və Tura xanım Axundova (25 dekabr 1909). Arxiv sənədlərində hər iki övladın müsəlman dininə mənsub olduqları qeyd olunmuşdur.[2]
Bəhram bəy Axundov 1932-ci ildə Bakı şəhərində vəfat etmişdir.[2]
 |
 |
GECEMIZ.AZ |  |
 |
|