Macera Zamani I Movsum - Wikipedia - Gecemiz.az

Pendlton Vordun müəllifi olduğu "Macəra zamanı" Amerika animasiya serialının ilk mövsümü 2010-cu il aprelin 5-də "Cartoon Network" telekanalında yayımlanmağa başlamış və həmin il sentyabrın 27-də başa çatmışdır. Serial "Frederator Studios" və "Cartoon Network Studios" tərəfindən istehsal edilmişdir. Əsər "Frederator" şirkətinin "Nicktoons Network" şəbəkəsi üçün hazırladığı "Random! Cartoons" animasiya layihəsi çərçivəsində istehsal olunmuş qısametrajlı filmə əsaslanır. Mövsümün süjet xətti Finn adlı gənc oğlanın və onun ən yaxın dostu, həm də qəyyumluğunda olan qardaşı Ceyk adlı sehrli itin macəralarından bəhs edir. Ceyk istədiyi vaxt öz forma və ölçülərini dəyişmək qabiliyyətinə malikdir. Finn və Ceyk post-apokaliptik "Ooo" ölkəsində məskunlaşıblar. Onlar burada serialın digər əsas qəhrəmanları - Şahzadə Saqqız, Buz Kralı, Vampir Kraliçası Marselin, Qabarıq Kosmos Şahzadəsi və BMO ilə qarşılıqlı münasibətdə olurlar.

I mövsüm
Ölkə	ABŞ
Seriya sayı	26
Ekranlaşdırma
Orijinal kanal	Cartoon Network
Orijinal efir	aprel 5 (5-04) – 27 sentyabr 2010 (2010-09-27)
Mövsüm xronologiyası
← Əvvəlki — Sonrakı → II mövsüm

İnternetdə viral uğur qazandıqdan sonra qısametrajlı film "Cartoon Network" şirkətinin diqqətini cəlb etmiş və televiziya kanalı tərəfindən tam metrajlı seriala çevrilmişdir. Serialın ilkin baxışı 2010-cu il martın 11-də baş tutmuş, rəsmi premyerası isə həmin ilin aprelin 5-də gerçəkləşmişdir. Mövsümün ssenari strukturu tanınmış ssenaristlər - Adam Muto, Elizabet İto, Pendlton Vord, Şon Himenes və Patrik Makheyl tərəfindən işlənib hazırlanmışdır. Layihənin yaradıcı heyətinə həmçinin Kent Osborn, Pit Braunqardt, Niki Yanq, Armen Mirzayan, C.K. Kuintel, Koul Sançes, Tom Herpiç, Bert Yun və Ako Kastuera daxil olmuşdur.

Mövsümün ilk seriyaları olan "Slumber Party Panic" və "Trouble in Lumpy Space" 2,5 milyon tamaşaçı tərəfindən izlənilib. Bu göstərici "Cartoon Network" kanalının tamaşaçı sayının əvvəlki illə müqayisədə əhəmiyyətli dərəcədə artdığını göstərmişdir. Mövsüm 27 sentyabr 2010-cu il tarixində "Gut Grinder" adlı final seriyası ilə başa çatmışdır. Serial efirə çıxdıqdan qısa müddət sonra tənqidçilərin müsbət rəyini qazanmış və tamaşaçıların böyük marağına səbəb olmuşdur. 2010-cu ildə "Macəra zamanı" serialının "My Two Favorite People" adlı bölümü, qalib gəlməsə də, "Primetime Emmi" mükafatlarında "Qısa formatlı animasiya oroqramı" kateqoriyası üzrə namizəd olmuşdur. Mövsümün yayımlanmasından sonra müxtəlif epizodları əhatə edən bir sıra toplu DVD-lər buraxılmışdır. 2012-ci il 10 iyul tarixində mövsümün tam versiyası Region 1 DVD formatında, 2013-cü il 4 iyun tarixində isə Blu-ray formatında təqdim edilmişdir.