 |
 |
Gecemiz.az |  |
 |
1830-cu ildə ABŞ prezidenti Corc Vaşinqtonun Maunt-Vernonda yerləşən qəbrindən onun kəllə sümüyünün oğurlanmasına cəhd edilmişdir. Lakin oğru səhvən hakim Başrod Vaşinqtonun qohumlarından birinin qalıqlarından kəllə sümüyünü oğurlamışdır. Məzar yerinin dağıdılması daha yeni və təhlükəsiz qəbr yerinin tikilməsi ilə nəticələnmişdir.
Corc Vaşinqtonun 1799-cu ildəki ölümündən sonra ABŞ hökuməti onun qalıqları ABŞ Konqres Binasına köçürməyi planlaşdırdığını açıqlamışdır. Binanın zirzəmisində hazırlanan və şüşə ilə mühafizə olunan sərdabə Vaşinqtonun qalıqlarını saxlamaq üçün nəzərdə tutulmuşdur. Vaşinqton öz vəsiyyətində Maunt-Vernonda dəfn olunmaq istədiyini bildirsə də, Marta Vaşinqton ərinin qalıqlarının paytaxta köçürülməsinə razılıq vermişdir. Lakin dəfn mərasiminin detalları ilə bağlı yaranan mübahisələr Vaşinqtonun qalıqlarının köçürülməsi prosesini ləngitmişdir. Nəticədə, Vaşinqtonun qalıqları onun Maunt-Vernondakı mülkündə yaradılmış ayrı sərdabəyə qoyulmuşdur.[1][2]
Növbəti 30 il ərzində Maunt-Vernon sərdabəsi baxımsız hala düşmüşdür. Məzarı ziyarət etməyə gələn bir çox şəxs xatirə məqsədilə artefaktlar götürür və məzarın ətrafındakı bitkiləri qoparırdılar. Məzarın ətrafındakı ağaclar və digər bitkilər tamamilə qoparılıb məhv edilmişdir. Hətta Rusiyanın ABŞ-dəki səfiri qəbrin yaxınlığında bitən ağacın budağını Rusiya çarı I Aleksandra təqdim etmək üçün qoparmışdır.[3]
1830-cu ildə Maunt-Vernon malikanəsinin sahiblərindən biri II Con Avqustin Vaşinqton mülkün bağbanlarından birini işdən qovmuşdur. Bağbanın adı naməlumdur. Qisas almaq istəyən işsiz bağban gizlicə sərdabəyə daxil olmuş və Corc Vaşinqtonun kəllə sümüyünü oğurlamaq istəmişdir. Lakin o, səhvən Corc Vaşinqtonun qohumu olan hakim Başrod Vaşinqtonla qohumluğu olan Blekbern ailəsinin bir fərdinin kəllə sümüyünü götürmüşdür. Məzar yerinin çox baxımsız olması bağbanın bu cür səhv etməsinə səbəb olmuşdur. Belə ki, Vaşinqton ailəsinin 20 üzvü sərdabədə dəfn olunsa da, tabutların çoxu çürümüşdü və insan skeletləri yerə səpələnmişdu. Lakin Corc və Marta Vaşinqtonun qalıqları dəfn edilməzdən əvvəl qurğuşunla örtüldüyü üçün bu vəziyyətdən qorunmuşdur.[4][5]
Oğurluq cəhdindən sonra Konqres Vaşinqtonun qalıqlarını onların mülkiyyətinə verilməsini tələb etmiş, lakin Con Vaşinqton buna qarşı çıxararaq Vaşinqtonun "mükəmməl səssizliyini" pozmaq istəmədiyini bildirmişdir.[2] Bunun yerinə mövcud sərdabənin yanında yenisinin inşasını əmr etmişdir. Corc və Marta Vaşinqtonun qalıqları 1831-ci ildə yeni sərdabəyə köçürülmüşdür. Bu qərar bəziləri tərəfindən tənqidlə qarşılanmışdır. 1841-ci ildə sərdabəni ziyarət edən VI Karlayl qrafı Corc Hovard buranı "qəfəslə qarajın qarışığına" bənzətmişdir.[6]
1837-ci ildə Pensilvaniya mərmərindən daha yeni və təmtəraqlı sarkofaq hazırlanmış və Vaşinqtonun qurğuşun örtüklü tabutu bura köçürülmüşdür. Həmin vaxt tabut ilk və son dəfə açılmış, beləcə, Con Vaşinqton əmisinin bədənini son dəfə görə bilmişdir (bəzi nəzəriyyələrə görə tabutun açılmasına səbəb kəllə sümüyünün yerində olub-olmadığını yoxlamaq üçün idi). "Harper's New Monthly Magazine" tərəfindən nəşr olunmuş hesabatda qeyd olunmuşdur ki, cəsəd "zamanın təsirindən demək olar ki, zərər görməmişdi".[7][8][9][10]
1837-ci ildə Corc Vaşinqtonun tabutunun açılması zamanı ondan bir neçə saç telinin oğurlandığı iddia olunmuşdur. Lakin bu saç tellərinin hərraca çıxarılması cəhdləri uğursuzluqla nəticələnmiş və onların həqiqiliyi şübhə doğurmuşdur.[11]
Jül Jermen Kloke Markiz de Lafayetin həyatından bəhs edən və 1835-ci ildə nəşr etdirdiyi kitabında qeyd edir ki, Lafayet 1824-cü ildə ABŞ-yə gələndə Corc Vaşinqtonun ögey nəvələrindən birindən xüsusi üzük qəbul etmişdir. Bu üzükdə Corc və Marta Vaşinqtonun saçları saxlanılırdı.[12]
 |
 |
GECEMIZ.AZ |  |
 |
|