Avropa Liqasının 3-cü təsnifat mərhələsinin cavab oyunları çərçivəsində keçirilən “Şaxtyor” (Ukrayna) – “Panatinaikos” (Yunanıstan) matçında qalmaqal yaşanıb.

“gecemiz.az” xəbər verir ki, görüşün 82-ci dəqiqəsində baş hakim Daniel Siebert “Şaxtyor”un futbolçusu Oleq Oçeretkoya qırmızı vərəqə göstərib. 

Baş məşqçi Arda Turan isə referinin qərarına etiraz edərək mübahisəyə başlayıb. Türkiyəli mütəxəssis bu hərəkətinə görə qırmızı vərəqə ilə cəzalandırılıb.

Daha da qəzəblənən Turan hakimin üzərinə gedib. Ukrayna təmsilçisinin texniki heyətində yer alan bir şəxs vəziyyətə müdaxilə edib.

UEFA da “Şaxtyor”un baş məşqçisi Arda Turana qarşı intizam tədbirləri tətbiq edəcəyini açıqlayıb.

Qurumun İntizam Komitəsi baş məşqçi ilə bağlı yekun qərarını növbəti günlərdə açıqlayacaq.

Qeyd edək ki, sözügedən matçın əsas və əlavə vaxtı 0:0 hesabı ilə yekunlaşıb. Bu komandalar arasında ilk oyunda da heç-heçə qeydə alındığı (0:0) üçün penaltilər seriyası oynanılıb. Burada isə Yunanıstan klubu daha dəqiq olub (4:3) və mərhələ adlayıb.