İyulun 7-si odlu silahla özünü güllələyən Gürcüstanın Acarıstan Muxtar Respublikasının keçmiş hökumət sədri Tornike Rijvadze müalicə üçün Türkiyəyə aparılıb. 

“gecemiz.az” xəbər verir ki, bu barədə Gürcüstan mediası məlumat yayıb.

Türkiyə klinikalarından birinə köçürülən Rijvadzenin ağciyərinin zədələndiyi, vəziyyətinin sabit ağır olduğu bildirilir.

Qeyd edək ki, T. Rijvadze Dəniz Nəqliyyatı Agentliyinin rəhbəri Aleksi Axvledianiyə məxsus odlu silahla iki dəfə sinə nahiyəsinə atəş açıb. 

Təcili tibbi yardım zamanı onun cibindən bir məktub tapılıb. Məktubda sabiq hökumət rəhbəri bir sıra şəxsi və siyasi məqamlara toxunub. Qeyd edib ki, son vaxtlar ona qarşı korrupsiya və narkotacirləri himayə etmək kimi ciddi ittihamlar irəli sürülüb.

Faktla bağlı Gürcüstan Cinayət Məcəlləsinin 115-ci maddəsi (özünü öldürmə həddinə çatdırma) üzrə araşdırma başlanıb.

Qeyd edək ki, Tornike Rijvadze bu ilin 4 aprel tarixində Acarıstan hökumətinin sədri postundan istefa vermişdi. O, 2018-ci ildən bu vəzifəni icra edirdi və hakimiyyətin gənc simalarından biri kimi tanınırdı. İstefasından sonra mediada onun adı bir sıra qalmaqallarda hallanıb.