Elvida Cenub Seheri Film 2006 - Wikipedia - Gecemiz.az

Ana Səhifə - Elvida Cenub Seheri Film 2006

Əlvida, cənub şəhəri
Janr	Dram
Rejissor	Oleq Səfərəliyev
Ssenari müəllifi	Rüstəm İbrahimbəyov
Baş rollarda	Fuad Poladov-Fariz Fəxrəddin Manafov-Rza Teymur Bədəlbəyli-Alik Mehriban Zəki-Maya
Operator	Murad Əliyev
Bəstəkar	Səyavuş Kərimi
Rəssam	Mayis Ağabəyov
İstehsalçılar	"Azərbaycanfilm" Kinostudiyası "İbrus" Studiyası
İlk baxış tarixi	4 sentyabr 2006, Bakı("Şərq-Qərb" Beynəlxalq Film Festival) 16 fevral 2007, Berlin, Almaniya(Berlin Film Festivalı) 1 aprel 2007, İstanbul, Türkiyə(İstanbul Film Festivalı)
Filmin digər adı	Ümid Sahili (çəkiliş zamanı)
Filmin növü	tammetrajlı bədii film
Müddət	90 dəq.
Ölkələr	Azərbaycan Rusiya
Dillər	Azərbaycan dili rus dili
İl	2006
Texniki məlumatlar	10 hissə 35 mm "Kodak" kinolenti
Rəng	rəngli
Çəkiliş yeri	Bakı Bakı, Milli Park Bakı, İçərişəhər
IMDb	ID051861

Məzmun

redaktə

Filmdə Qarabağ problemi nəticəsində paytaxta axışan qaçqınlar və onların şəhər əhalisi ilə münasibətləri öz əksini tapıb. Filmin mövzusu qısa bir zaman kəsiyini – bir yay ərzində baş vermiş hadisələri əhatə edir.

"Əlvida, cənub şəhəri" Bakının 2000-ci il mənzərəsinin əks olunduğu kadrlarla başlayır. Kabinetdə şıq kostyumlu və qalstuklu şəxs mobil telefonla hansısa binaların sökülməsi tapşırığını verir. Növbəti kadrlarda isə başı dibindən qırxılmış, çiynində çanta olan gənc oğlan bir restorana girir və burada tanışı ilə .. rastlaşır. Onların söhbətindən belə məlum olur ki, bu gənc -Alik (Teymur Bədəlbəyli) həbsxanadan çıxıb. Tanışı – Rza (Fəxrəddin Manafov) ona Farizi (Fuad Poladov) öldürməyi təklif edir. Əks halda, Fariz Alikin "işini" bitirəcək. Alik isə razılaşmır. Daha sonra titrlərin köməyilə hadisələrin 1988-ci il Bakısında cərəyan etdiyi aydın olur. İçərişəhər həyətlərinin biri... Ümumi həyətə, ümumi pilləkənə bir neçə qonşunun qapısı açılır. Alikin də yaşadığı bu həyətin sakinləri çoxdanın qonşularıdır. Tək bir nəfərdən başqa. Fariz ailəsi ilə bura yenicə köçüb. Odur ki, şəhər həyatına alışmayan 7-8 yaşlı oğlu hər gün özünü eyvanın başından milis işçisi qonşunun həyətdə duran maşınının üstünə "yüngülləşdirir". Hər dəfə də maşının sirenalarının səsi məhəlləni başına götürür. Maşın sahibi, qonşular narazılıqlarını bildirsələr də, vəzifə sahibi olan Farizdən çəkindikləri üçün "dərinə" getmirlər. Alik isə məhəllənin müdafiəçisi kimi tanınır. Məlum səbəblərdən rusların, ermənilərin Bakını tərk etdiyi qarışıq bir dövrdə Alik tanıdığı adamların dadına çatır. Qarşı tərəfi hədələməkdə isə ona cibində gəzdirdiyi tapança yardımçı olur. Nəhayət, yaxınlıqdakı zirzəminin boşaldılması məqamı da yetişir. Caz qrupunun məşq etdiyi zirzəmidə Fariz restoran açmaq fikrindədir. Qrup üzvləri isə caz festivalına hazırlaşdıqlarından zirzəmini tərk etmək istəmirlər. Alikin sevdiyi qız – Maya (Mehriban Zəki) da qrupun solistidir. Odur ki, gənc oğlan yenidən tapançasını çıxararaq, musiqiçilərin müdafiəsinə qalxır. Növbəti günlərin birində qonşular həyətdə süfrə arxasına toplaşaraq, həyətləri haqqında videokamerası ilə film çəkən və buna görə də Farizin qəzəbinə tuş gələn yeniyetmə oğlanın "kişi olmasını" qeyd edirlər. Bu məqamda yeni qonşu həyətə girir və pilləkənlərlə evinə qalxır. Qonşular onu içməyə dəvət etsələr də, Fariz ikrah hissi ilə təklifi rədd edir, "Sizin kimilərlə içmərəm, hamınızın axırına çıxacağam" deyir. Alik isə ona edilən hədəyə dözməyib pilləkənlərlə qalxır və Farizə möhkəm bir şillə çəkir. Bu hadisədən sonra Alik milis idarəsinə çağırılır. Onun gəzdirdiyi tapançanın adi alışqan olmasına baxmayaraq, törətmədiyi cinayətlərdə təqsirli bilinir və həbs edilir. Filmin sonunda hadisələr yenə də 2000-ci ilə qayıdır. Dəniz kənarında Rza Alikə bir daha Farizi öldürməyi təklif edir. Alik isə "yox" cavabı verərək, Azərbaycanı tərk edəcəyini deyir. Vaxtilə neft quyusunda birgə işlədiyi, tənbəlliyi üzündən yalnız Alikin özünə ortaq götürdüyü Rza isə cibindən bıçaq çıxardıb, ona bir neçə zərbə endirir. Alik qan içində yerə yıxılır. Film Bakının gecə panoramı, caz musiqisinin sədaları altında bitir.

Festivallar və mükafatlar

redaktə

1)2006-cı ildə V milli "Qızıl Çıraq" Mükafatı

Film ən yaxşı tammetrajlı bədii film nominasiyasında Mükafat almışdır.
Film ən yaxşı ssenari nominasiyasında Mükafat almışdır.
Aktyor Teymur Bədəlbəyli ən yaxşı kişi rolu nominasiyasında Mükafat almışdır.

2)2007-ci ildə Moskvada "Moskovskaya Premyera" IV Kinofestivalı

Film "Art-Xətt" proqramının ən yaxşı filmi nominasiyasında tamaşaçı rəğbəti Mükafatı almışdır.

Film haqqında

redaktə

Film adından da göründüyü kimi, "Bir Cənub Şəhərində" filminin məntiqi davamı kimi düşünülmüşdür.
Film Rüstəm İbrahimbəyovun "Təbəssümlə Oyanaraq" əsəri əsasında çəkilmişdir.
Film 2007-ci ilin fevralında Berlin Film Festivalında, iyulunda Çexiyanın Uherske-Hradişte şəhərində keçirilən beynəlxalq film festivalında, sentyabrında isə Qazaxıstanda IV beynəlxalq "Avrasiya" kinofestivalında nümayiş etdirilmişdir.