Otel - Wikipedia - Gecemiz.az

Mehmanxana, hotel (fr. hôtel) və ya otel — Başqa yerdən gələn yolçuların, qonaqların və turistlərin müvəqqəti yaşaması üçün xüsusi təhcizatlı otaqları olan bina və ya obyekt. Mehmanxana nömrələrində təklif olunan xidmətlər kiçik otaqda sadə yataqdan tutmuş böyük, yüksək keyfiyyətli çarpayılara, komod, soyuducu və başqa mətbəx avadanlığı, bahalı mebel, televizor və vanna otaqları ilə təhciz olunmuş böyük lüks nömrələrə kimi dəyişə bilir. Bahalı olmayan kiçik mehmanxanalar qonaqlar üçün ancaq əsas zəruri xidmətlər təklif edə bilər. Böyük, bahalı mehmanxanalar isə basseyn, kompüter, printer və digər ofis ləvazimatları olan biznes mərkəzləri, uşaqlara baxım, tədbirlər üçün konfrans zalları, tennis və basketbol üçün meydançalar, trenajor zalları, restoranlar, spa salon, ictimai tədbirlərin keçirilməsi üçün məkanlar daxil daha geniş əlavə xidmətlər təklif edə bilər. Qonaqların öz nömrələrini təyin etməsi üçün mehmanxanalarda nömrələr adətən nömrələnir və yaxud bəzi kiçik hotellərdə və ya qonaq evlərində (B&B) olduğu kimi onlara adlar qoyulur. Bəzi yüksək kateqoriyalı butik hotellərin nömrələri fərdi dizayn və üslubda bəzədilir. Bəzi hotellər nömrə və yemək müqaviləsinin bir hissəsi kimi yemək təklif edir. Yaponiyada kapsul hotellərin ancaq yatmaq üçün çox kiçik otaqlar və ümumi vanna otaqları təklif edir.

Mehmanxana xidmətləri funksiyalarına, ölçülərinə, mürəkkəbliyinə və qiymətlərinə görə dəyişir. Bir çox mehmanxanalar və bu sahədəki böyük şirkətlər hotel növlərinin təsnifatı üçün sektor standartları təyin etmişlər. Xidmətlərin tam spektrinə malik yüksək səviyyəli hotel dəbdəbəli şərait (rahatlıq), xidmətlərin tam spektri olan yerləşdirmə, hotel ərazisində restoran, və konsyerj, otaq xidməti və paltarların ütülənməsi kimi yüksək səviyyəli fərdi xidmət təklif edir.

Mehmanxanalar göstərdikləri xidmət və nömrələrin avadanlıqlarına görə müxtəlif siniflərə bölünürlər. Sadə, baha olmayan mehmanxanalar Azərbaycanda tarixən karvansara adlanıb.

Butik hotellər, brendi olmayan kiçik müstəqil, yüksək səviyyəli şəraiti olan hotellərdir.

Orta və kiçik hotellər ərazilərində məhdud sayda xidmət və şərait təklif edirlər.

Ekonom sinif (klass) hotellər, məhdud sayda xidmət və şəraiti olan nömrələr təklif edən kiçik və orta mehmanxanalardır.

Uzun müddətli yaşayış üçün nəzərdə tutulmuş hotellər, ənənəvi mehmanxanalardan fərqli olaraq daha uzunmüddətli yaşayış üçün lazım olan xidmətlərin tam spektrini təklif edirlər.

Taymşer və təyinat klubları, mövsümi istifadə üçün ayrıca yerləşdirmə vahidinə sahib olma kimi mülkiyyət formasıdır.

Motel, hər otağa birbaşa ayrıca girişi və avtomobil dayanacağı (parkınq) olan azmərtəbəli yaşayış obyektləridir.

Bir çox hotellər ictimai şüura populyar mədəniyyət vasitəsilə daxil olmuşdur. Bəzi hotellər, xüsusi olaraq kazino və kurortlar üçün tikilir.

Böyük əksəriyyət mehmanxana müəssisələrini, bütün şöbələrin əlaqəli işinə nəzarət edən baş icraçı direktor olan (çox vaxt "hotel idarəçisi" adlanan) baş menecer, müxtəlif şöbələrə (məs. yemək xidməti və s) nəzarət edən şöbə müdirləri, orta zümrə menecerləri, inzibati personal və xətt rəhbərləri idarə edirlər. Hər bir şöbə rəhbəri konkret öz istiqamətini idarədə edir, personalı təlimatlandırır, şöbə büdcəsini idarə edir və öz komandasının hotelin standartlarına uyğun keyfiyyətli xidmət göstərməsini təşkil edir. Təşkilatı struktur, vəzifələrin həcmi və iyerarxiya şobənin ölçüsündən, onun funksiya və sinfindən asılıdır və çox vaxt hotelin sahibləri və idarəedici şirkətləri tərəfindən müəyyən olunur.